O Concello da Estrada e a Fundación Galega contra o Narcotráfico unen as súas forzas para potenciar o deporte como factor de protección fronte ás adiccións.
A charla-coloquio Adolescencia e novas adiccións programada para o martes 18 de febreiro no MOME contará con expertos, educadores, familias e deportistas que abordarán a realidade actual das adiccións, con especial atención ás denominadas adiccións comportamentais e tecnolóxicas (Internet, Redes Sociais, Móbiles, Videoxogos e Apostas) que máis afectan a adolescentes e xóvenes.
A xornada de sensibilización e prevención ofrecerá información de alto interese e novas pautas para familias, educadores e adestradores da man de dous dos expertos máis recoñecidos a nivel nacional, os doutores en Psicoloxía Antonio Rial Boubeta (Facultade de Psicoloxía da USC) e Manuel Isorna Folgar (Facultade de Educación e Traballo Social da UVigo).
O acto, programado a partir das 18,30h no MOME, é de entrada gratuita e contará coa asistencia de representantes dos centros educativos, ANPAS, familias, entidades sociais, adestradores/as e clubes deportivos.
O EIDO DEPORTIVO COMO ESCENARIO DE OPORTUNIDADE
O fomento dun lecer saudable a través do deporte segue a constituír un dos principais pilares sobre os que basear as políticas de prevención nos países desenvolvidos. A evidencia científica acumulada durante décadas respalda o papel da actividade físico-deportiva como un factor primordial para o desenvolvemento integral e harmónico de nenas e nenos.
Desta maneira clubes e entidades deportivas constitúen excelentes escenarios de oportunidade para mitigar a pegada negativa derivada dun uso temperá, frecuente e intensivo dos dispositivos tecnolóxicos, que constitúe nestes momentos segundo a OMS un serio problema de saúde pública.
Sobre esta base a FGCN está a desenvolver co apoio do Concello da Estrada e a Secretaria xeral para o Deporte o programa Adestrar sen Pantallas, en colaboración directa con clubs deportivos do municipio, destacando especialmente a figura do adestrador/a deportivo como referente para a mocidade.
Author: FGCN
...
