Deporte con causa
O domingo 26 de novembro tivo lugar en Lugo a I Carreira Popular Campus Terra- III Carreira Interuniversitaria contra a Droga, un evento deportivo de interese unido a unha causa social da máxima relevancia que apoian as Universidades de Santiago, A Coruña e Vigo a iniciativa da Fundación Galega contra o Narcotráfico.
Con saída e percorrido pola contorna do Estadio Gergorio Pérez Rivera, a carreira congregou a máis de trescentos deportistas, contando cunha clasificación especial intercampus para fomentar a competición e a sana rivalidade entre deportistas das universidades participantes.
O traballo coordinado dos Servizos de Deportes fai posible a celebración desta carreira, que se repite con carácter anual rotando polos distintos campus galegos. O éxito da convocatoria dende a súa primeira edición motivou a adhesión das tres universidades do Norte de Portugal (Universidade do Porto, Trasosmontes e Universidade do Miño).
O obxectivo compartido por fundación e universidades é promover a práctica deportiva como un hábito saudable que aporta indubidables beneficios para o desenvolvemento integral das persoas, ademáis de fomentar a sensibilización da comunidade universitaria ante a problemática das drogodependencias, nun encontro que promove a convivencia e irmandamento entre estudantes e universidades.
A cuota de inscrición na carreira contou cun euro de donativo solidario destinado á causa antidroga, de axuda aos proxectos desenvolvidos pola Fundación Galega contra o Narcotráfico.
Houbo Clasificación xeral e Clasificación Universitaria Intercampus, dominada pola USC, con premios e agasallos para os primeiros clasificados.
A colaboración entre USC, UDC e UVigo coa Fundación Galega contra o Narcotráfico trascende o plano deportivo, complementándose con exposicións, xornadas e distintas accións de sensibilización orientadas á comunidade universitaria
Author: FGCN
...
