Os conselleiros de Presidencia, Xustiza e Deportes, Diego Calvo, e de Sanidade, Antonio Gómez Caamaño, asinaron co presidente da Fundación Galega contra o Narcotráfico, Manuel Couceiro, o convenio para a posta en marcha do programa Adestrar sen pantallas, gañar en saúde. A iniciativa, dirixida a promover desde o deporte unha maior sensibilización social sobre a necesidade dun uso saudable das pantallas entre a poboación máis nova, implantarase como proxecto piloto nos concellos da Estrada, Cambados, Ribeira e Vilagarcía de Arousa.
Adestrar sen pantallas, gañar en saúde céntrase no desenvolvemento de competencias emocionais e relacionales, nos riscos asociados ao uso abusivo de pantallas e nas estratexias para a promoción do benestar dixital. As actuacións están orientadas a fomentar a práctica deportiva e a actividade física como alternativa de lecer saudable e desenvolvemento integral a través da figura dos adestradores/as deportivos, que serán formados e capacitados de maneira específica para traballar co programa.
Con esta medida quérese tamén favorecer a detección precoz e a prevención das novas formas de adicción entre a poboación máis nova, especialmente o uso compulsivo da Internet, Redes Sociais, Móbiles, posible adicción aos Videoxogos e Apostas Deportivas, á vez que se fomenta o desenvolvemento de habilidades sociais, emocionais e físicas a través da práctica deportiva, como contrapunto ao sedentarismo e ao uso excesivo de pantallas.
Author: FGCN
...
