Fontecarmoa acolle a XV edición do Torneo Deportivo Eu Saúde/Panos Brancos (10.11.2023), coa participación de douscentos deportistas de idades entre 12 e 16 anos, estudantes de ESO do IES Armando Cotarelo, IES Castro Alobre, Colexio San Francisco e Colexio Sagrada Familia de Vilagarcía de Arousa. O CIPF Fermín Bouza Brey participa activamente na organización coa colaboración de alumnado e profesorado dos Ciclos de Baloncesto.
A FGCN quere destacar e agradecer as colaboracións que fan posible a celebración deste evento deportivo: Consellería de Sanidade, Concello de Vilagarcía de Arousa, Porto de Vilagarcía, Obra Social LaCaixa, CONGALSA, Autocares Grupo Abalo, Protección Civil e especialmente a profesorado e alumnado dos centros educativos participantes.
O propósito que guía esta iniciativa -organizada pola Fundación Galega contra o Narcotráfico en estreita colaboración cos centros educativos- é fomentar os valores do deporte e a aposta por un estilo de vida no que a saúde sexa protagonista, promovendo a práctica deportiva como unha opción de ocio saudable, aumentando a sensibilización e o rexeitamento ás drogas e o narcotráfico entre os máis novos.
A celebración do torneo serve tamén para realizar paralelamente diversas actividades de prevención de drogodependencias e outras adiccións nos centros educativos. En opinión dos organizadores “o deporte axúdanos a formar mellores persoas, transmitindo valores como esforzo, autosuperación, disciplina, respeto… sen esquecer os seus indubidables beneficios para a saúde”. Unha festa deportiva que supón tamén unha ocasión excelente para que os representantes dos distintos centros midan as súas forzas e habilidades en catro dos deportes que contan con máis aficionados e practicantes: Baloncesto, Fútbol, Atletismo e Voleibol, un deporte en auxe entre a mocidade.
Author: FGCN
...
